محمد النحاس وفن الثورة!
وحياة مامة فخامتك… طيب وحياة سوزان
تسامحني عشان شتمتك… وأنا واقف في الميدان
كان المفروض أجيبك… وتشوف شعبك حبيبك
علشان تاخد نصيبك… م الحب وم الحنان
أنا آسف وبصراحة… أصلي ما كنتش أصيل
يا معلمني القباحة… نفسي أرد الجميل
يا مظبط أهل بلدك... أكتر من إسرائيل
هتقولي إيه اللي فيها.. هاقولك فيها فيل
انا آسف إني سبتك... تخلع من غير حساب
كان المفروض حاسبتك... زي ما قال الكتاب
ما بننساش الجمايل... والشعب ف قلبه شايل
وهنعمل فيك عمايل... والبركة في الشباب
فيه أكتر من حريقة... وفي كل بيت شهيد
فاكر أهل الدويقة... فاكر قطر الصعيد
طب سرطان الخضار... والعيشة الغالية نار
والمعبر والجدار... ولا الفكر الجديد
آسف علشان سكتنا... طول الوقت اللي فات
وانت مسود حياتنا... وبتسرق مليارات
دلوقتي الفرصة جاتني... وهاحاسبك ع اللي فاتني
وهارد حقوق بلادي... وآخد حق اللي مات
آسف لجمال وعزمي... ولصفوت ولسرور
كل اللي مصوا دمي... ولسه في القصور
آسف علشان سايبكو... وحياة بلدي لاجيبكو
وفي التحرير بانيلكو... أحلى وأجمل... خابور
3 comments:
love it.
مساء الخير يا سهى ... من فترة لم ازور مدونتك .. واليوم ارى تلك المفاجأة ... هناك مخرج الماني صديقي يخرج فيلم عن الفن والثورة واسنا اساعدة فيه ... هل تعرفين طريقة للوصول إلى هذا المغني ... مع الاسف انا لا أعرفه ... نريد التواصل معه والتسجيل ... تحياتي
أهلا يا شريف! للأسف أنا ما اعرفش محمد النحاس، إنما لقيت الأغنية عن طريق اليوتيوب وما اعرفش وسيلة للاتصال بيه.
تحياتي
Post a Comment